الحكايه بدأت بضيق
بخنقه .. بألم ... بشعور بالوحده وسط ناس اعتبرتهم فيوم من الايام جزء مني
شعور بالاحباط
باليأس
حسيت ان النهايه قربت
فجأه .. الأمل ظهر تاني
بعد ما كان خلاص اختفى واتمسحت ملامحه
اتقبلت فتدريب المدربين
احسن تدريب فمصر
اتقبلت انا و 38 واحد وواحده فمصر
من بين الاف
و بين الالاف دول اختاروا 6500 CV
و من السيفيهات دي اختاروا 500 بس عشان يعملوا الانترفيو ويدخلوا الامتحان
و من الخمسميه دول اختاروني انا و 38 واحد وواحده
و من ال 38 واحد وواحده انجح واكون من الاوائل كمان
التدريب كان فالقاهره
عديت صعبات كتير
صعوبة السفر اولهم
ان القطر يتعطل بيا 8 ساعات فالسكه
اني اسكن فمكان بيتقطع فيه الكهربا والميه تقريبا "طول اليوم"
ان المسافه من مكان سكني لمكان التدريب ساعتين
اني اركب تلات مواصلات رايح وتلاته جاي
اني اكون غريبه فبلد غريبه
ابويا وامي بعيد عني
اهلي اللي عايشين فنفس البلد ماحدش فيهم يسأل عليا مجرد سؤال
صحابي اللي كلت معاهم عيش وملح فجأه اكنهم مايعرفونيش
مشقة العيشه فالقاهره لوحدي مسؤله عن نفسي
افتقدت صوت امي اوي
حنيتها .. ضحكتها... زعلها مني .. حتى أكلها
افتقدت ابويا و نرفزته و عصبيته و حنيته
افتقدت رزالة اخويا و هزاره و ضحكه وهبله
افتقدت القطط :)
افتقدت سريري و اوضتي و منطقتي
افتقدت شغلي
افتقدت كل حاجه
الموقف اكيد ماكنش كله دراما و تشويق ومغامرات
الكوميديا كانت سيدة الموقف اوقات كتير
دايما الكوميديا كانت غالبه فالمواصلات
خصوصا من تباعين المكروباصات
او سواقين مكروباصات الصحراوي
او حتى ركاب القطر
عمري ما شوفت واحد يسوق مكروباص من القاهره لاسكندريه وايده فالمتور و ايد الركاب كمان هههههههههههههههههههه
:
وغيره طبعا من المواقف
حسيبني من كل اللي فات ده
الأهم بقى من كل ده الجندي المجهول
اللي ماكنش بيسيبني لحظه
حتى وهو فاسكندريه
علاطول جنبي و ساندني
اسهر اذاكر يسهر معايا
اسافر يسافر معايا
القطر يقف بيا فوسط السكه يركب و يجيلي
مانسيش مناسبه خاصه بيننا
مازهقش من وقوفه جنبي فيوم
ماتخنقش ماملش
كان واقف جنبي وقت ما كل اللي حواليا بعدوا عني
كان سبب راحتي و تطميني فوقت انا كنت خايفه فيه
كان مؤمن بيا فالوقت اللي انا يأست فيه من نفسي و قدراتي
كل حاجه بيعملها معايا باخلاص
اي موقف
اي تشجيع
اي جدعنه
كل حاجه طالعه من القلب بجد
نجاحي فالتدريب ده اغلى عندي من اي نجاح تاني
لأن كل ثانيه كانت بتعدي كان وراها حاجات كتيييير اووووي اوي
الاهم من الدراسه القيمه جدا
و طريقة التفكير اللي اتطورت و فرأيي اتغيرت للاحسن 180 درجه
هو اني اتعلمت حاجات كتير بجد
اتعلمت اني ماعتمدش على حد ولا ادي حد اكبر من قدره
اتعلمت ان الانسان موقف
عرفت غلاوة امي و ابويا عندي بجد
عرفت اني عمري ماقدر اتغر عن بلدي
اذا كنت طلعت بره اسكندريه شهرين كنت حموت
امال لو سيبت مصر بحالها!!
اتعلمت اقدر قيمة كل حاجه
كل احساس جميل
كل مشاعر صادقه
كل حد يقدملي اي حاجه ولو صغيره ايا كانت الحاجه دي
اتعلمت اني ماندمش على حاجه كويسه عملتها و ماتقابلتش ساعتها الا بالشر
لأن ربنا بيشيل الخير و مش بيضيعه
و عرفت
اني فأيدي كنز حقيقي اسمه "عبد الله"
الجندي المجهول
اللي هو السبب الحقيقي بجد فنجاحي
و فأي حاجه كويسه ممكن اوصلها فحياتي
شكرا بجد على اي حاجه كويسه او وحشه حصلتلي
عشان منها انا اتعلمت
شكرا يا أمي و يا أبويا
شكرا يا عبد الله "يا زوجي " - ان شاء الله -
شكرا يا رب :)
ليست هناك تعليقات:
إرسال تعليق